Հայաստանը սատարում է Գերմանիայի նախագահության առաջնահերթությունները: Այս մասին Հայաստանի ԱԳ նախարար Էդվարդ Նալբանդյանը հայտարարեց հունիսի 29-ին Երեւանում Գերմանիայի ԱԳ նախարար, ԵԱՀԿ գործող նախագահ Ֆրանկ-Վալտեր Շթայնմայերի հետ համատեղ մամուլի ասուլիսի ժամանակ:
Նրա խոսքով, հանդիպման ընթացքում քննարկվել են ԵԱՀԿ նախարարական առաջիկա երկու հանդիպումներին առնչվող հարցեր:
«Հայաստանը բարձր է գնահատում Գերմանիայի աջակցությունը համանախագահների ջանքերին՝ ուղղված Լեռնային Ղարաբաղի հակամարտության խաղաղ ճանապարհով կարգավորմանը: Նախագահության առաջին իսկ օրից Գերմանիան նպաստել է դեսպան Կասպրշիկի թիմի ընդլայնմանը եւ միջադեպերի հետաքննության մեխանիզմների հաստատմանը: Այս երկու հարցերը եղել են Վիեննայում եւ Սանկտ Պետերբուրգում կայացած հանդիպումների օրակարգում: Դրանց իրականացումը թույլ կտա առաջընթաց արձանագրել խնդրի լուծման գործում»,- նշեց նախարարը:
