Վրաստանը Եվրոպական Միության հետ համաձայնագիր է կնքել եւ այժմ Եվրոպայի հետ հարաբերությունների նոր փուլ է սկսվել. Եվրոպայի հետ ինտեգրացիան այն է, ինչին ձգտում է Վրաստանը: Այդ մասին հուլիսի 1-ին ԵԽԽՎ-ի Խորհրդարանական Վեհաժողովի 25-րդ լիագումար նիստի բացմանը հայտնել է Վրաստանի վարչապետ Գեորգի Քվիրիկաշվիլին, հայտնում է NEWS.am-ի թղթակիցը Թբիլիսիից:
Նրա խոսքով, այսօր, երբ ամբողջ աշխարհը բախվում է հսկայական խնդիրների, ԵԱՀԿ-ն պետք է ուժեղ լինի եւ ի վիճակի լուծելու բոլոր խնդիրները, որոնք ի հայտ են գալիս Եվրոպայում: «Գերմանիան այսօր շատ կարեւոր դեր է խաղում աշխարհի անվտանգության գործում: Հաշվի առնելով մեր տարածաշրջանում տեղի ունեցող իրադարձությունները, մենք տեսնում ենք, որ խախտվում են Հելսինկիի եզրափակիչ ակտի սկզբունքները: Ռազմական ուժի կիրառությունը պարադոքսալ է մեր ժամանակների համար, իսկ ԵԱՀԿ-ի առաքելությունն այստեղ բացառիկ կարեւորություն ունի», - ընդգծել է Գեորգի Քվիրիկաշվիլին:
Վրաստանը, շարունակել է նա, շատ բան է անում, որպեսզի ղեկավարությունը ազատական լինի եւ Եվրոպայից աջակցություն ստանա: «ՆԱՏՕ-ի հետ մեր ինտեգրացիան ուղղված չէ ինչ-որ մեկի դեմ: Մենք ձգտում ենք ապահովել Վրաստանի պաշտպանությունը: Մենք երջանիկ ենք, որ դուք հայտարարում եք. Վրաստանը ճիշտ ուղու վրա է: Մենք ձգտում ենք նրան, որ ընտրություններն արդար լինեն: Մենք կանցնենք այս քննությունը եւ կպաշտպանենք մեր պատիվը», -ամփոփել է Վրաստանի վարչապետը:
