Թուրքիայում հանգստացող հայ զբոսաշրջիկների թիվն անցած տարվա համեմատ նվազել է: Այս մասին NEWS.am-ի հետ զրույցում ասաց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը՝ նշելով, որ Թուրքիա այցելությունների նվազումը հիմնականում կապված է վերջին շրջանում այնտեղ հաճախ տեղի ունեցող ահաբեկչական գործողությունների հետ.
«Հայաստանից Թուրքիա այցելություններն էապես նվազել են, կան շատ հետաքրքիր այլընտրանքներ, հիմա քաղաքացիներն այդ ուղղություններով են գնում: Շատ երկրներից են սկսել Թուրքիա չգնալ, ոչ միայն Հայաստանից, որովհետեւ վերջին ժամանակաշրջանում այնտեղ շատ են լինում ահաբեկչական գործողություններ եւ դեպի Թուրքիա զբոսաշրջային այցելությունները տարբեր երկրներից, այդ թվում նաեւ Հայստանից նվազել են»:
Հարցին՝ կա՞ն հստակ տվյալներ, թե այս տարի անցած տարվա համեմատ որքանով է Թուրքիայում հանգստացող հայ զբոսաշրջիկների թիվը նվազել, Մեխակ Ապրեսյանը պատասխանեց, որ ՀՀ Էկոնոմիկայի նախարարության զբոսաշրջության վարչության պարտականությունների մեջ չի մտնում ըստ երկրների անել արտագնա զբոսաշրջության հաշվառում. «Բայց փորձագիտական գնահատականներով, քննարկումների արդյունքում, երեւում է, որ դեպի Թուրքիա այցելությունները տարեցտարի նվազում են»: