Այս տարվա «Ոսկե Ծիրան» Երևանի միջազգային փառատոնը նաև նշանավորվել է հայկական 360 աստիճան կրթական ֆիլմի ցուցադրությամբ: Ֆիլմի մշակումն իրականացրել է Արմֆոնի եւ Արմթաբի արտադրող «Technology and Science Dynamics» ընկերությունը: Ֆիլմը տիեզերքի մասին է, ունի կրթական-ուսուցողական նշանակություն:
Ինչպես NEWS.am-ին տեղեկացրին TSD մամուլի ծառայությունից, «Technology and Science Dynamics» ընկերության հիմնադիր Վահան Շաքարյանը նշել է, որ ֆիլմը ստեղծվել եւ մշակվել է «Immersive Education Solutions» նախագծի շրջանակում:
«Աշխարհի կենտրոնից տիեզերքներից մեկի մասնիկը» հայկական առաջին 360 աստիճան ֆիլմն է, որը նախատեսված է անշարժ պլանետարիումների/ աստղացուցարանների համար: Ֆիլմն առաջարկում է ճամփորդել անցյալ, ապա վերադառնալ ներկա և քայլ առ քայլ ուսումնասիրել աստղային երկնքի վերաբերյալ մարդկային պատկերացումները հնագույն ժամանակներում և մեր օրերում:
Ընկերությունում նշում են, որ «Technology and Science Dynamics» ընկերությունը նպատակ չունի նախագծի շրջանակներում մշակվող ֆիլմերով փոխարիել դասագրքերը և տրադիցիոն ուսուցման մեթոդները: Մեր նպատակն է աջակցել կրթական հաստատություններին ուսուցման գործընթացում և տրամադրել գիտահանրամատչելի ֆիլմեր, որոնք կարող են օժանդակել դասավանդմանը և ավելի պատկերավոր ու դյուրընկալի դարձնել այնպիսի առարկաներ ինչպիսիք են օրինակ՝ ֆիզիկան, քիմիան, աստղագիտությունը, մաթեմատիկան, կենսաբանությունը և անգամ պատմությունը: Հաշվի առնելով ֆիլմերի կրթական առանձնահատկությունները՝ թիմը բաղկացած է ոչ միայն անիմատորներից և դիզայներներից, այլ նաև մանկական հոգեբաններից և մանկավարժներից, ովքեր աջակցում են ֆիլմի պատրաստման գործընթացին և համապատասխանեցնում են այն միջին և ավագ դասարանի աշակերտների համար:
Փառատոնի ընթացքում հյուրերին հնարավորություն է ընձեռվել «ուղևորվել» տիեզերք և 15 րոպե անցկացնել աստղերի և մոլորակների կողքին` պարզապես գտնվելով պլանետարիումի ներսում: Իսկ դուրս գալիս մարդկանց ժպիտն ու երեխաների ոգեվորվածությունը լավագույնս խոսեցին ֆիլմից ստացած տպավորությունների մասին:
Տեղեկացնենք, որ ֆիլմի երժշտական գործիքավորումը Արա Գևորգյանինն է, իսկ տեքստը կարդում է Մխիթար Ավետիսյանը:
