Արտակարգ դրության ռեժիմ մտցնելը եւս մեկ անգամ ցուցադրում է, որ հեղաշրջման փորձը խորը հետք է թողել Թուրքիայի քաղաքականության եւ հասարակության վրա: Այս մասին հայտարարել է Գերմանիայի ԱԳ նախարար Ֆրանկ-Վալտեր Շթայնմայերը:
Նրա խոսքով՝ Թուրքիայի նկատմամբ իրենց դիրքորոշումը եւ սպասելիքները անփոփոխ են. հեղաշրջման փորձի հետաքննությանն ուղղված բոլոր միջոցառումների ժամանակ պետք է պահպանվեն իրավական պետության նորմերը, հավասարակշռվածությունը եւ համաչափությունը»:
Նա նշել է. «Պետության կողմից ցանկացած միջոցառման կիրառման հիմնավորումը պետք է լինի հակաօրինական գործողություններին բացառապես ապացուցված մասնակցությունը եւ ոչ մի դեպքում ենթադրվող քաղաքական համոզմունքները»:
Բացի այդ, կարեւոր է, որ արտակարգ դրության ռեժիմը սահմանափակվի անհրաժեշտ ժամկետով եւ անմիջապես հանվի այդ ժամկետը լրանալուն պես: «Այսպիսի մոտեցումը բխում է նաեւ Թուրքիայի շահերից, այլապես երկիրը կմասնատվի եւ կթուլանա ինչպես ներսից, այն պես էլ դրսից»,– եզրափակել է նա:
