Թուրքիայի նախագահ Ռեջեփ Թայիփ Էրդողանը Եվրամիությանը հիշեցրել է 3 մլրդ եվրո պարտքի մասին։ Այս մասին նա ասել է գերմանական ARD հեռուստաալիքին տված հարցազրույցում։
Թուրքիայի նախագահը դժգոհել է, որ ԵՄ–ն մինչեւ հիմա Անկարային չի վճարել ամբողջ գումարը, որը պետք է հատկացվեր միգրանտներին տեղավորելու եւ պահելու համար։ «Մենք գումարի միայն չնչին մասն ենք ստացել»,– ասել է Էրդողանը։
Նա նաեւ հիշեցրել է, որ Թուրքիան ընդունել է 3 մլն փախստականի՝ նրանց վրա ծախսելով 12 մլրդ եվրո։ «Մենք կատարում ենք մեր խոստումը, իսկ եվրոպացիները՞»,– ասել է Էրդողանը։
Հիշեցնենք, որ մարտի 18-ին Եվրամիության ու Թուրքիայի միջեւ միգրացիոն գործարքի համաձայն՝ Թուրքիան պարտավորվում է ընդունել Հունաստանից Եվրոպա մտնել փորձող բոլոր միգրանտներին։ Դրա դիմաց Անկարան անվիզա ռեժիմ է ստանում եւ 3 մլրդ եվրո։