Շտապօգնության ծառայությունում անհանգստացած են ՊՊԾ գնդի ներսում մնացած երկու բուժաշխատողների ճակատագրով: Ծառայության տնօրեն Թագուհի Ստեփանյանը NEWS.am-ի հետ զրույցում ասաց, որ այսօր այն բանից հետո, երբ տեղեկություն է տարածվել ոստիկանի սպանվելու մասին, իրենք անհանգստացել են, զանգահարել ՊՊԾ գնդի ներսում գտնվող բժիշկ Նորայր Թեւանյանին, որը ենթակայանի վարիչին ասել է, որ տագնապած են անընդհատ հնչող կրակոցների պատճառով:
«Պատանդ պահվող մեր բժիշկները խիստ տագնապած են: Ձայնից էլ էր զգացվում: Ենթակայանի վարիչը նրանց ասաց՝ եթե այդքան տագնապած եք, հենց հիմա վեր կացեք, ասեք՝ մենք դուրս ենք գալիս: Եթե նրանք պնդում են, որ ձեզ պատանդ չեն պահում, ուրեմն պետք է չխանգարեն ձեզ»,- ասաց Թագուհի Ստեփանյանը:
Նրա խոսքով՝ դրանից հետո կապը կտրվել է: Մոտ 10 րոպեից ենթակայանի վարիչը կրկին փորձել է կապվել Նորայրի հետ, սակայն հեռախոսին այլ անձ է պատասխանել, որը չի ներկայացել եւ հրաժարվել է հեռախոսը Նորայրին փոխանցել՝ նշելով, որ նա զբաղված է: Երրորդ զանգին նույնպես այդ անձն է պատասխանել, որն ասել է, որ հեռախոսը նպատակահարմար չի գտնում բուժաշխատողներին փոխանցել: Ենթակայանի վարիչի խնդրանքին՝ բաց թողնել գոնե կին բուժքրոջը, հեռախոսը վերցրած անձը պատասխանել է, որ իրենց մոտ գտնվող բժիշկները լավ մասնագետներ են, որոնց ներկայությունը ՊՊԾ գնդի ներսում անհրաժեշտ է:
Նշենք, որ բուժաշխատողները արդեն չորրորդ օրը մնում են ՊՊԾ գնդի ներսում: Ավելի վաղ երկուսը դուրս էին եկել գնդի տարածքից, մյուս երկուսը շարունակում են մնալ զինված խմբի կողմից գրավված տարածքում: