Ադրբեջանն արգելակում է Վիեննայի եւ Սանկտ Պետերբուրգի հանդիպումների ընթացքում ձեռք բերված պայմանավորվածությունների իրականացումը: Այդ մասին օգոստոսի 18-ին Հայաստանի կառավարության հերթական նիստից հետո լրագրողների հետ զրույցի ընթացքում հայտնել է Հայաստանի փոխարտգործնախարար Շավարշ Քոչարյանը:
Անդրադառնալով այն հարցին, թե կա արդյոք որեւէ առաջընթաց հրադադարի ամրապնդման վերաբերյալ պայմանավորվածությունների կատարման տեսանկյունից, որոնք ձեռք էին բերվել վերոհիշյալ հանդիպումների ընթացքում, փոխարտգործնախարարը նշել է. «Առաջընթաց չկա, բայց կա մեկ հանգամանք. համապատասխան առաջարկներ են ներկայացվել: Կա նաեւ երկրորդ հանգամանքը, որը կանխատեսելի էր. Ադրբեջանը, ինչպես միշտ, բանակցությունների սեղանի շուրջ մի բան է պայմանավորվում, իսկ գործնականում արգելափակում է պայմանավորվածությունների իրականացումը»: Առաջընթաց, հավելել է Շավարշ Քոչարյանը, կլինի, եթե կոնկրետ մեխանիզմներ սկսեն գործել:
