Ռուսաստանը չէր կարող Թուրքիայից ավելի հուսալի ընկեր գտնել. կողմերը բացահայտ քննարկում են գոյություն ունեցող խնդիրներն ու տարաձայնությունները: Sputnik Turkish-ին տված հարցազրույցում այս մասին հայտարարել է Թուրքիայի ԱԳ նախարար Մեւլութ Չավուշօղլուն:
Նրա խոսքով՝ Թուրքիայի համար Ռուսաստանն ընկեր է տարածաշրջանում: «Ռուսաստանը նույնպես չէր կարող Թուրքիայից ավելի հուսալի ընկեր գտնել»,- հավելել է Չավուշօղլուն:
Ըստ ՌԻԱ Նովոստիի՝ թուրք նախարարը նշել է, որ Անկարան եւ Մոսկվան բոլոր հարցերը, «այդ թվում՝ այն հարցերը, որոնց մասով տարաձայնություններ կան, պատրաստ են բաց քննարկել»:
«Հետագայում կարող ենք կարծիքների տարաձայնություն ունենալ, բայց մեր գլխավոր նպատակն է՝ երկկողմ հարաբերությունները հասցնել նախկինից ավելի բարձր մակարդակի: Մենք միշտ Ռուսաստանին համարել եւ համարում ենք ոչ միայն մեր հարեւանը, այլեւ մեր կարեւոր գործընկերը: Այդ պատճառով մենք շարունակում ենք Ռուսաստանին ընդառաջ քայլեր անել: Այս ամբողջ ընթացքում մենք մեծ նշանակություն ենք տվել Ռուսաստանի հետ մասին մեր հայտարարությունների զուսպ, հավասարակշռված տոնին: Մենք պատժամիջոցներ չենք սահմանել Ռուսաստանի նկատմամբ՝ այդպիսով մնալով ՆԱՏՕ-ի կազմում միակ երկիրը, որը չի սատարել պատժամիջոցները: Ռուսաստանն ու ռուս ժողովուրդը հնարավորություն են ունեցել համոզվել դրանում»,- ասել է Չավուշօղլուն:
