Թալիշում ապրիլի 4-ին ծանր վիրավորված Ավետիս Զարգարյանը վերջապես հիվանդասենյակ է տեղափոխվել: Այս մասին NEWS.am-ի թղթակցին ասաց Ավետիսի մայրը՝ տիկին Սոնյան:
«4.5 ամիս վերակենդանացման բաժանմունքում ենք անցկացրել, հիմա վերջապես հիվանդասենյակ են տեղափոխել, բայց սարքերը դեռ միացված են, քայլել չի կարողանում, ձեռքերը շատ թույլ չեն, շշուկով է խոսում, որովհետեւ կոկորդում սարք կա միացված»,- ասաց տիկին Սոնյան՝ նշելով, որ որդին 20-ամյակը հենց Վերակենդանացման բաժանմունքում է նշել:
Ավետիսին, մոր խոսքով, այժմ արդեն վերականգնողական բուժում է հարկավոր, ինքն այդ հարցով նաեւ Պաշտպանության նախարարին է դիմել: Ի դեպ, վիրավորված զինծառայողին առ այսօր նախարարությունից ոչ ոք չի այցելել, Զարգարյանների հետ ոչ մի պաշտոնյա չի հանդիպել:
Հիշեցնենք, որ մարտերի ընթացքում գնդակը մտել էր Ավետիսի ծնոտը, թիկունքով ներքեւ էր իջել, վնասել էր մի քանի ող եւ ողնուղեղը: Երբ նրան Երեւան էին տեղափոխում, բժիշկները հույս չէին տալիս, սակայն տղան կարողացավ բոլորին ապացուցել իր ուժը եւ դուրս գալ կրիտիկական վիճակից: Այս ամիսների ընթացքում Ավետիսը, սակայն, գամված է անկողնում, շշուկով է խոսում: Հարազատների միակ ցանկությունն այն է, որ այս-ամյա Ավետիսը կարողանա ինքնուրույն քայլել, խոսել:
Նշենք, որ քառօրյա պատերազմից օրեր անց Հայաստանի Կառավարությունը որոշում կայացրեց, որ այն վիրավոր զինծառայողները, որոնց չեն կարողանա Հայաստանում պատշաճ օգնություն տրամադրել, բուժման կուղարկվեն արտասահման բյուջետային միջոցներով: 4 ամիս է անցել, սակայն ոչ մի զինծառայողի դեռեւս արտասահման չեն ուղարկել, թեեւ այնտեղ բուժվելու կարիք մասնավորապես մի քանի զինծառայող ունեն: