Այս տարվա երկրորդ եռամսյակում Ֆրանսիայում օտարերկրյա զբոսաշրջիկների թիվը զգալի պակասել է: Այս մասին են վկայում Ֆրանսիայի վիճակագրության եւ տնտեսական հետազոտությունների ինստիտուտի տվյալները, հայտնում է Reuters-ը:
Հաղորդվում է, որ զբոսաշրջիկների մոտ Ֆրանսիայում հանգստանալու պահանջարկը նվազել է հաճախակի փողոցային գործադուլների, վատ եղանակի եւ գրոհայինների հարձակումների պատճառով:
Այսպես՝ պաշտոնական տվյալների համաձայն՝ հունիսի վերջին ֆրանսիական հյուրանոցներում իջեւանած օտարերկրյա զբոսաշրջիկների թիվը երեք ամսում 8.5 տոկոսով պակասել է: Այդ նույն ցուցանիշը Փարիզում պակասել է 12.9 տոկոսով: Եղանակը նույնպես վնասել է Ֆրանսիայի տուրիստական բիզնեսին: Քաղաքից դուրս գտնվող զբոսաշրջային վայրերի այցելուների թիվը 6.8 տոկոսով պակասել է: Հաղորդվում է, որ այս տարվա գարունը Ֆրանսիայում վերջին 50 տարվա ընթացքում ամենացուրտն ու անձրեւոտն է եղել:
