Ռուսական մարտական ինքնաթիռները Իրանի Համադանում գտնվող բազան լքել են անցած հինգշաբթի՝ օգոստոսի 18-ին: Այս մասին «Մեհր» գործակալությանն ասել է Իրանի Ազգային անվտանգության բարձրագույն խորհրդի քարտուղար Ալի Շամհանին:
«Ի սկզբանե չէր պլանավորվում, որ ռուսական ինքնաթիռները կմնան բազայում: Պայմանավորվածության համաձայն՝ դրանք մնալու էին մինչեւ անցած հինգշաբթի»,- ասել է նա՝ ընդգծելով, որ ՌԴ օդատիեզերական ուժերի ինքնաթիռները իրանական բազան լքել են «պլանային կարգով, այլ ոչ թե որեւէ երկրի ճնշմամբ»:
«Իրանա-ռուսական ռազմավարական փոխգործակցություը զարմացրել է մյուս երկրներին: Նրանցից ոչ մեկը չի կարողանում իրականացնել Հալեպի շրջափակման ճեղքման պլանը»,- շեշտել է Շահմանին: Նրա խոսքով՝ «ահաբեկիչները, չնայած ԱՄՆ եւ տարածաշրջանի մի շարք երկրների հովանավորությանը, Սիրիայի որոշ շրջաններում վերջին շնչում են, եւ անհրաժեշտ է օգտվել այս հնարավորությունից վճռական եւ անշրջելի հաղթանակի հասնելու համար»:
Մեկնաբանելով Հալեպի շուրջ ստեղծված իրավիճակը՝ Իրանի Ազգային անվտանգության բարձրագույն խորհրդի քարտուղարն ասել է, որ այնտեղ անցկացվող «ցամաքային գործողությունները մշակվում են իրանցի ռազմական խորհրդատուների մասնակցությամբ եւ օդից աջակցության կարիք ունեն»:
