Սիրիայում գործողությունը ցուցադրում է Թուրքիայի նախագահ Ռեջեփ Թայիփ Էրդողանի արտաքին քաղաքականության վերբեռնումը, հայտնում է The Wall Street Journal-ը: Պարբերականի կարծիքով՝ Էրդողանը ձգտում է վերջ տալ երկարատեւ միջազգային մեկուսացմանը, որը վնաս է պատճառել տնտեսությանը եւ անվտանգությանը, եւ մտերմանալ այնպիսի գործընկերների հետ, ինչպիսին ԱՄՆ-ն է:
«Մեզ պատուհասած շատ բան Սիրիայի իրավիճակի եւ Սիրիայում մեր քաղաքականության հետեւանքն է»,- հայտարարել է Թուրքիայի փոխվարչապետ Նումեն Քուրթուլմուսը:
Մի շարք բարձրաստիճան պաշտոնյաների կարծիքով՝ վերբեռնումը նշանակում է դիվանագիտության առավել պրագմատիկ մոտեցում: Նրանք հայտարարել են, որ Սիրիայում բռնությունը դադարեցնելու ձգտումը օգնել է հարթել Ռուսաստանի հետ հաշտեցման ճանապարհը, իսկ հաջորդ քայլը կլինի ԱՄՆ հետ հարաբերությունների ջերմացումը: Թուրքիան նախատեսում է դառնալ «դիվանագատիկան ծանրքաշային», միջնորդ Վաշինգտոնի եւ Թեհրանի միջեւ, պնդում է պարբերականը:
Սիրիայի ուղղությամբ քաղաքականության փոփոխությունների թվում WSJ-ը նշում է այն փաստը, որ Թուրքիան նախագահ Բաշար Ասադի հանդեպ կոշտ դիրքորոշումը մեղմացրել է, չնայած նախկինում հայտարարում էր, որ նրան պետք է ցանկացած գնով տապալել:
Ռազմական գործողությունն ընդգծում է Սիրիայի տարածքային ամբողջականության հարցում ԱՄՆ-ի, Ռուսաստանի եւ Իրանի հետ Թուրքիայի ընդհանուր նպատակները, նշված է հոդվածում: Ըստ պարբերականի՝ դրա պատճառներից մեկն այն է, որ Վաշինգտոնում եւ Անկարայում զգացել են, որ սիրիացի քրդերը խախտել են պարտավորությունները՝ Թուրքիայի հետ սահմանին չափազանց մեծ տարածք տնօրինելով: Պաշտոնատար անձինք ասում են, որ պատրաստ են դիվանագիտական խնդիրներից շատերի վրա աչք փակել, եթե դաշնակիցները քրդական հարցում իրենց սատարեն:
«Մնացած ամեն ինչի մասին մոռացեք: Եթե նրանք այդ հարցում մեզ հետ համաձայն են, ապա ենք կարող ենք նրանց հետ խոսել»,- ասել է բարձրաստիճան մի պաշտոնյա:
