Քենիայում տեղի ունեցած Աֆրիկայի զարգացման վերաբերյալ Տոկիոյի միջազգային համաժողովի ընթացքում Ճապոնիան, շահադիտական նպատակներ հետապնդելով, փորձել է սեպ խրել Չինաստանի եւ Աֆրիկայի միջեւ, հայտնել է ՉԺՀ-ի ԱԳՆ-ի պաշտոնական ներկայացուցիչ Հուա Չունյինը, հայտնում է Սինհուան:
Ճապոնական տեղեկատվական Կիոդո Ցուսին գործակալության տվյալներով, օգոստոսի 28-ին TICAD-ի արդյունքում հրապարակվել է Նայրոբիյան հռչակագիրը, որում ասված է ՄԱԿ-ի ԱԽ-ի կանոնների եւ բարեփոխումների առաջընթացի հիման վրա ծովային կարգի պահպանման մասին: Մեկնաբանելով այդ հաղորդագրությունը, չինացի դիվանագետը հայտնել է, որ TICAD-ը պետք է դառնա Աֆրիկայի զարգացմանն աջակցությանն ուղղված բազմակողմանի փոխանակումների եւ համագործակցության հարթակ: Ցավոք սրտի, անցած շաբաթ տեղի ունեցած TICAD-ի 6-րդ համաժողովին Ճապոնիան, շահադիտական նպատակներ հետապնդելով, փորձել է իր կամքը պարտադրել աֆրիկյան պետություններին եւ սեպ խրել չինաաֆրիկյան հարաբերությունների մեջ:
Վերջնական փաստաթղթից դատելով, դրա` ծովին վերաբերող բովանդակությունը սահմանափակվում է աֆրիկյան ծովերում անվտանգության ոլորտում համագործակցությամբ: Ինչ վերաբերում է ՄԱԿ-ի ԱԽ-ի բարեփոխմանը, հռչակագրում օգտագործվել են Յոկոհամայում տեղի ունեցած նախորդ համաժողովի սկզբունքային ձեւակերպումները: Կիոդո Ցուսին գործակալության հաղորդագրությունը ոչ օբյեկտիվ է եւ չի արտացոլում իրականությունը, նշել է նա:
