«Սպառողների միությունը» ամիսներ առաջ սննդի պետական ծառայությանը տեղեկացրել է, որ իրենց կողմից ուսումնասիրության ենթարկված տասնհինգ զովացուցիչ ըմպելիքներից 11-ն անպիտան է ճանաչվել, սակայն, ծառայությունը քայլեր չի ձեռնարկում՝ խնդիրը վերացնելու ուղղությամբ։ Այս մասին այսօր՝ օգոստոսի 30-ին, լրագրողների հետ հանդիպմանն ասաց «Սպառողների միության» նախագահ Արմեն Պողոսյանը։ «Տեղական լիմոնադ արտադրողներ էին, որոնց փոքր ձեռնարկությունները գտնվում են մայրաքաղաքից դուրս կամ դրան մոտ։ Մենք հավաքել ենք դրանք երեխաների սննդի կետից, ուսումնասիրությունը պարզել է, որ նրանք չեն համապատասխանում սննդի անվտանգության նորմերին։ Հիմա երկու ամիս առաջ հրավիրեցին մեզ ու արտադրողներին, ասվեց, որ նրանց ժամկետ տրվի, որ փակվեն կամ շտկեն թերությունները։ Երկուսուկես ամիս անց ոչ մի նորություն»,- ասաց Արմեն Պողոսյանը՝ նշելով՝ այդ ձեռնարկությունները պետք է փակվեն։
Անդրադառնալով արագ սննդին՝ Արմեն Պողոսյանը նշեց, որ իրենք բազմաթիվ բողոքներ են ստանում քաղաքացիներից։
«Բողոքում են, որ գիրանում են։ Դա այն նյութից է, որ խառնում են սննդին։ Կան նաեւ ուրիշ վտանգներ հակասանիտարական վիճակից առաջացող։ Սննդի կետերում առաջին պայմանը հոսող ջուրն է։ Եթե մի տեղ սնունդ է վաճառվում, լվացվելու տեղ պետք է լինի այնտեղ, հոսող ջուր պետք է ունենան։ Եթե չունեն, դա արդեն հանցագործություն է»,- ասաց Արմեն Պողոսյանը՝ նշելով, որ սննդի անվտանգության պետական ծառայությունը պետք է պարբերաբար ստուգումներ անցկացնի նման վայրերում։ Արմեն Պողոսյանը նաեւ վրդովմունք հայտնեց, որ Երեւանում կրկին աճում է փողոցային առեւտուրը։
«Փողոցային առեւտուրը պետք է իսպառ արմատախիլ արվի, սա արաբական երկիր չէ»,- ասաց Արմեն Պողոսյանը: