Նոր Զելանդիայի ոստիկանությունը հետաքննում է  Հարավային կղզու ֆերմաներից մեկից 500 կովի անհետացման գործը։ Տեղացիների փոխանցմամբ՝ նախկինում իրենք երբեք անասնագողության այդպիսի  ծավալի չէին բախվել, հայտնում է BBC–ի ռուսական ծառայությունը։

Կորուստը հայտնաբերվել է կենդանիներին հաշվելիս։ Հուլիսի սկզբին  նախորդ հաշվարկի ժամանակ ֆերմայում 1300 կով կար։ Ոստիկանությունը ենթադրում է, որ գողությունը կատարվել է երկու ամսվա ընթացքում՝ առանձին դրվագներով։

Ֆերմայի տերը միջադեպը չի մեկնաբանել։ Նախնական հաշվարկներով՝ նրան պատճառվել է մինչեւ 750 հազար դոլարի վնաս։

Նոր Զելանդիայում հաշվվում է մոտ 10 միլիոն կով, ինչը գրեթե 2 անգամ գերազանցում է երկրի բնակչության թիվը։ Մեկ կովի արժեքը հասնում է մոտ 1000 դոլարի։

Ֆերմերները նշել են, որ յուրաքանչյուր կովի ականջին էլեկտրոնային համարանիշ կա, որը գողանալուց հետո կարելի է հանել, սակայն առանց դրա կենդանու վաճառքը կդժվարանա։