ՀՀ վարչապետ Հովիկ Աբրահամյանի գլխավորությամբ կառավարությունում շահագրգիռ գերատեսչությունների ղեկավարների եւ ներկայացուցիչների մասնակցությամբ տեղի է ունեցել Հարկային նոր օրենսգրքի նախագծի շուրջ խորհրդակցություն:
Կառավարությունից NEWS.am-ին հայտնում են, որ կառավարության ղեկավարը նշել է, որ Հարկային նոր օրենսգրքի նախագծի վերաբերյալ ստացվել են բազմաթիվ առաջարկություններ Ազգային ժողովի պատգամավորների, միջազգային կառույցների եւ քաղաքացիական հասարակության ներկայացուցիչների կողմից, որոնք պետք է մանրամասն վերլուծվեն եւ դառնան քննարկման առարկա՝ մինչ ԱԺ-ում նախագծի երկրորդ ընթեցմամբ քննարկվելը:
Այնուհետեւ անդրադարձ է կատարվել Հարկային նոր օրենսգրքի նախագծի մի շարք դրույթների շուրջ ներկայացված առաջարկություններին, որոնց առնչությամբ տեղի է ունեցել մտքերի շահագրգիռ փոխանակություն:
Ամփոփելով՝ վարչապետը կարեւորել է Հարկային օրենսգրքի նախագծի շուրջ ինտենսիվ քննարկումները եւ ներկայացված այն առաջարկությունների ընդունումը, որոնք կնպաստեն հարկային դաշտի բարելավմանը, բիզնեսի համար թափանցիկ, մրցակցային դաշտի ամրապնդմանը ու ներդրումային գրավչության բարձրացմանը: