Վրաստանի կրթության եւ գիտության նախարար Ալեքսանդր Ջեջելավայի հրավերով ՀՀ ԿԳ նախարար Լեւոն Մկրտչյանի գլխավորած պատվիրակությունը 2016 թվականի սեպտեմբերի 12-ից 14-ը կգտնվի Վրաստանում:
Հայաստանի ԿԳՆ-ից NEWS.am-ին հայտնում են, որ պատվիրակության կազմում են` ՀՀ ԿԳՆ աշխատակազմի արտաքին կապերի եւ սփյուռքի վարչության սփյուռքի բաժնի պետ Կարեն Մնացականյանը եւ ՀՀ ԿԳՆ կրթական ծրագրերի կենտրոնի տնօրեն Գրիշա Հովհաննիսյանը:
Այցի ընթացքում նախատեսվում են մի շարք հանդիպումներ կրթության եւ գիտության ոլորտի պատասխանատուների հետ, մասնավորապես, կքննարկվեն երկու երկրների կրթական համակարգերի բարեփոխումների, կրթական քաղաքականության, կրթության որակի ապահովման եւ օրենսդրական դաշտի կատարելագործման, ինչպես նաեւ բարձրագույն կրթության ոլորտում հետագա հնարավոր համագործակցության վերաբերյալ հարցեր: Նախատեսվում են նաեւ մինչգերատեսչական համաձայնագրի շրջանակներում գործուղված Հայաստանի Հանրապետության եւ Վրաստանի ուսանողների հիմնախնդիրներին վերաբերող հարցերի քննարկում: Այցի օրակարգում են Ջավախքի հայերենով ուսուցմամբ դպրոցներին վերաբերող հարցեր՝ ուսուցիչների վերապատրաստումների արդյունավետ կազմակերպում, որպես հումանիտար օգնություն` դասագրքերի, ուսումնամեթոդական եւ դպրոցական գրադարանային գրականության տրամադրում:
Կողմերը կքննարկեն նաեւ երկու երկրների վարչապետների հանդիպման ընթացքում ձեռքբերված պայմանավորվածությունները եւ դրանց իրականացման մեխանիզմները:
