Աշխարհի ամենատարեց տղամարդը՝ 113-ամյա իսրայելցի Իսրայել Կրիստալը նշել է իր բար միցվան, որը բաց էր թողել Առաջին համաշխարհային պատերազմի պատճառով: Այս մասին գրում է Gazeta-ն՝ վկայակոչելով BBC-ն:
Նրա դուստրն ասել է, որ հայրը բար-միցվան ընտանիքի եւ ընկերների հետ նշել է Հայֆեի սինագոգում:
Կրիստալը ծնվել է 1903 թվականին Լեհաստանում: Նա պետք է իր բար-միցվան նշեր 1916 թվականին, բայց նրա մայրը դրանից երեք տարի առաջ վախճանվել է, իսկ հայրը զորակոչվել է ռուսական բանակ:
Բար միցվան հուդայական ծես է, որն իրականացվում է հրեա տղայի կամ աղջկա կրոնական չափահասության հասնելուց հետո (13 տարի ու 1 օր տղաների համար եւ 12 տարի ու 1 օր աղջիկների համար):
Երկրորդ համաշխարհային պատերազմը նա վերապրել է Օսվենցիմի մահվան ճամբարում՝ այնտեղ կորցնելով կնոջն ու երկու երեխաներին:
1950 թվականին Կրիստալը՝ երկրորդ կնոջ եւ որդու հետ տեղափոխվել է Իսրայել:
2016 թվականի հունվարի 19-ին Յասուտարո Կոիդեի մահից հետո նա ճանաչվել է աշխարհի ամենատարեց տղամարդը: