Թեհրանը վստահ է, որ Դեյր էզ-Զոր քաղաքում սիրիական զորքի դիրքերի ուղղությամբ ԱՄՆ-ի ավիահարվածները ռազմական սխալ չեն եղել: Երկուշաբթի` սեպտեմբերի 19-ին նման կարծիք է հայտնել Իրանի խորհրդարանի նախագահի` միջազգային հարցերով օգնական Հոսեյն Ամիր Աբդոլլահյանը, հայտնում IRNA գործակալությունը:
«Սպիտակ տունն ամեն հնարավորն անում է` թուլացնելու Սիրիան եւ ամրապնդելու ահաբեկչական խմբավորումների դիրքերը», — հայտնել է նա: Աբդոլլահյանը նաեւ հավելել է, որ «ԱՄՆ-ի ռազմական ներկայությունը Սիրիայի օդային տարածքում միջազգային իրավունքի խախտում է, որովհետեւ համաձայնեցված չէ Դամասկոսի հետ»:
Քաղաքական գործիչը ենթադրում է, որ «Ռուսաստանը պետք է շրջահայաց լինի` կապված այն բանի հետ, որ Վաշինգտոնը չի կատարում Սիրիայի վերաբերյալ իր պարտավորությունները»:
Սեպտեմբերի 17-ին սիրիական բանակի հրամանատարությունը հայտնել է, որ ԱՄՆ-ի գլխավորած կոալիցիայի ավիացիան հարվածներ է հասցրել Դեյր էզ-Զոր քաղաքում: Դրա հետեւանքով սիրիացի 62 զինվորական զոհվել է, եւս 100 մարդ վնասվածքներ է ստացել:
Ռուսաստանի Պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովի խոսքով, ռմբակոծությանը մասնակցել է երկու F-16 եւ երկու A-10 ինքնաթիռ: Դրանք Սիրիայի օդային տարածք են մտել իրաքյան սահմանի կողմից: Կոնաշենկովը նշել է, որ հարվածից անմիջապես հետո հարձակման են անցել ահաբեկչական «Իսլամական պետություն» խմբավորման գրոհայինները:
