Հայաստանից տատանման տվիչներն ԱՄՆ-ում փորձարկումների ընթացքում լավագույն արդյունքներ են ցույց տվել: Այդ մասին NEWS.am-ի թղթակցին հայտնել է PSI («Precision Sensors & Engineering») ընկերության ավագ մասնագետ Ալեքսանդր Խաչունցը, որը մասնակցում է Երեւանում ընթացող «Պատրաստված է Հայաստանում» ցուցահանդեսին:
Հայկական սարքերը 2014 թվականի վերջին փորձարկվել են ԱՄՆ-ի հարավ-արեւմուտքում գտնվող Մոհավի անապատում: Այնտեղ Հայաստանից տվիչը գրանցել է մարդկային քայլերը 225-230 մ-ի վրա, մինչդեռ արտասահմանյան նմանատիպ սարքերը` 50 մ-ի վրա: «Բնականաբար ամեն ինչ կախված է նրանից, թե դա բետոն է, ավազ, թե հող, եւ թե ինչ հող է: Բայց պարզ է, որ հավասար պայմաններում մեր մոդելների ծածկույթն ավելի լավն է», - նշել է Խաչունցը:
Նրա խոսքով, տատանման դետեկտորներն աշխարհում շատ մեծ պահանջարկ ունեն, նախ եւ առաջ` անվտանգության նկատառումներից ելնելով: Խոսքը սահմանների եւ առանձին օբյեկտների պահպանության մասին է` ահաբեկչական գործողություններից պաշտպանության համար: Նման կիրառությամբ դետեկտորների շուկայի ծավալն այստեղ տարեկան 20 մլրդ դոլար է գնահատվում: Վիբրոդիագնոստիկան կիրառում են ոչ միայն անվտանգության ոլորտում, այլեւ քաղաքացիական նպատակներով` շինությունների, կամուրջների, ինչպես նաեւ նյութագիտության մեջ, օրինակ` ավիացիայում մետաղի հոգնածությունը որոշելու համար:
«Ինքնաթիռները եւ ուղղաթիռները հնարավոր է ստուգել նաեւ անմիջապես թռիչքից առաջ: Օրինակ, ուղղաթիռի թռիչքային հարթակի անկյուններում հնարավոր է տվիչներ տեղադրել, որոնք կստուգեն մեքենայի պտուտակաթեւերը: Հավանաբար հասկանում եք, որ դա թույլ կտա խուսափել հնարավոր աղետներից: Հնարավոր է ստուգել պատերի եւ ծածկերի անցքերը, իսկ կամուրջների դեպքում` ծանրաբեռնվածությանը դիմանալու կարողությունը տրանսպորտի մեծ հոսքի պայմաններում», - հավելել է Ալեքսանդր Խաչունցը:
Վիբրոդիագնոստիկայի հնարավորությունները դրանով չեն սպառվում: Սկզբունքորեն նման տեխնոլոգիան (նյութի վերլուծություն տատանումների հիման վրա) կարելի է կիրառել նաեւ բժշկության մեջ: Այդ նպատակով PSI-ն արդեն սարք է ստեղծել ներգանգային ճնշումը չափելու համար, ընդ որում` ոչ ինվազիվ (օրգանիզմի մեջ միջամտություն չի պահանջվում):