Քաղաքացիական ավիացիան շարունակում է ահաբեկչական խմբավորումների թիրախում մնալ: Միայն անցյալ տարի օդանավերի եւ օդանավակայանների վրա մի քանի հարձակում է իրականացվել: Այս մասին հիշեցրել են ՄԱԿ-ի Անվտանգության խորհրդի՝ ԱԳ նախարարների մակարդակով այսօրվա նիստի մասնակիցները:
Քաղավիացիայի համար ահաբեկչական սպառնալիքների հարցերին նվիրված նիստում Խորհրդի անդամներն օդային փոխադրումների անվտանգության մասին բանաձեւ են ընդունել:
«Անվտանգության խորհուրդը հաստատում է, որ բոլոր պետությունները պատասխանատվություն են կրում իրենց տարածքում օդային փոխադրումների շրջանակում ահաբեկչական հարձակումներից իրենց եւ այլ երկրների քաղաքացիների պաշպանությունն ապահովելու համար»,- ասված է բանաձեւում:
Դրանում ՄԱԿ-ի Անվտանգության խորհուրդն անդամ պետություններին կոչ է անում համագործակցել Քաղավիացիայի միջազգային կազմակերպության հետ, ամրապնդել օդանավակայաններում վերահսկողության, ստուգումների եւ զննումների միջոցառումները՝ նպատակ ունենալով բացահայտել եւ կանխել ահաբեկչական հարձակումների քաղավիացիայի օբյեկտների վրա:
