Ամենահզոր եւ ավերիչ երկրաշարժերը տեղի են ունենում, որպես կանոն, լիալուսնի շրջանում, հայտնել են ճապոնացի գիտնականները, որոնք ուսումնասիրել են Երկրի տեկտոնական ակտիվության վրա Լուսնի եւ Արեւի ազդեցությունը, հայտնում է Planet-today-ը՝ վկայակոչելով Nature ամսագրին:
Օրինակ, 2004-ին Հնդկական օվկիանոսում տեղի ունեցած երկրաշարժը, որը պատմության մեջ ամենից շատ մարդկային կյանք խլած տարերային աղետն էր (225-300 հազար մարդ) համընկել էր մեր մոլորակի վրա լուսնի գրավիտացիոն ուժերի ազդեցության ակտիվացմանը:
«Մենք նկատել ենք, որ ամենազանգվածային տեկտոնական տատանումները հաճախ համընկնում են լիալուսնի փուլի հետ: Ինչպես ցույց է տվել վերջին ուսումնասիրությունը, խոսքը ոչ թե պարզապես համընկնելու մասին է: Արեւի եւ Լուսնի հրահրած ազդեցությունը, իրոք, կարող է լրջագույնս ազդել երկրակեղեւի վրա»,- ասել է պրոֆեսոր Սատոշի Իդեն: