Հայաստանի խոշոր խանութների առաջ պետք է խստագույն պայմաններ դրվեն: Այս մասին սեպտեմբերի 26-ին ԱԺ-ում ասել է ընդդիմադիր պատգամավոր, նախկին վարչապետ Հրանտ Բագրատյանը:
Նա վստահ է, որ տնտեսության խտացումը սպառնում է Հայաստանից կապիտալի արտահոսքով: Հայաստանում տարեկան առեւտրաշրջանառությունը՝ 5 մլրդ դոլարը, տեսականորեն կարելի է բաշխել 15 մոլերի վրա, իսկ մնացած խանութները փակել: Բայց այդ դեպքում կդադարի զարգանալ ոչ միայն փոքր բիզնեսը, այլեւ հենց խոշորը: «Այս մասին է վկլայում Ուկրաինայի փորձը, որտեղ խոշոր բիզնեսի ուժեղ խտացում է: Ի՞նչ է կատարվում այնտեղ: Գումարը կուտակվում է խոշոր բիզնեսի մոտ, ու նա չի իմանում ինչ անի դրա հետ: Տներ են կառուցում, ու ոչ ոք դրանք չի գնում: Այդ ժամանակ նրանք սկսում են գումարը արտասահման տանել: Նույնն էլ մեզ մոտ կարող է սկսվել: Ինչ -որ առումով արդեն սկսվել է: Մեր երկրում կապիտալի տարեկան ներհոսքը միջինը 1.4 մլրդ դոլար է, արտահոսքը՝ 800 մլն»- նշել է Բագրատյանը:
Հենց այդ պատճառով էլ, պատգամավորի խոսքով, խոշոր խանութների առաջ նոր Կառավարությունը պետք է աշխատանքի խստագույն պայմաններ դնի:«Եթե երեսը փոքր բիզնեսի կողմը չշրջեն՝ ես նրանց ծրագիրը չեմ ընդունի ու դեմ կքվեարկեմ»,- հավելել է նա:
