Երեւանի «Զվարթնոց» օդանավակայանում վայրէջք է կատարել Մոսկվա-Երեւան ավտոբուսի վթարի հետեւանքով տուժածներին Հայաստան բերող ինքնաթիռը։
Առողջապահության նախարարության փոխանցմամբ, նախնական տվյալներով Երեւան հասած մեր հայրենակիցների թվում հիվանդանոցային բուժման կարիք ունեցողներ չկան։
Ինչպես ավելի վաղ հայտնել էր NEWS.am-ը, ինքնաթիռը պետք է Հայաստան տեղափոխեր Հյուսիսային Օսեթիայում տեղի ունեցած ավտոբուսի վթարի հետեւանքով տուժած 27 ուղեւորների ցանկը: Նույն օդանավով Հայաստան է տեղափոխվել նաեւ պատահարի հետեւանքով զոհված 1954 թ. ծնված Յուրա Պողոսյանի դին:
Ժամը 17.47-ին օդանավը մեկնել էր Բեսլանից:
ՀՀ ԱԻՆ հրապարակած ցուցակը
Վլադիկավկազի հիվանդանոցում շարունակում է մնալ չորս ՀՀ քաղաքացի: Տարբեր կարգի վնասվածքներով երկու քաղաքացի՝ Հարությունյան Ժ.Մ.-ն (ծնված՝ 1949թ.) եւ Պողոսյան Ս.Ս.-ն (ծնված՝ 1990թ.) գտնվում են Վլադիկավկազի հանրապետական կլինիկական հիվանդանոցում: Նրանց վիճակը գնահատվում է որպես ծանր:
Եվս երկու քաղաքացի՝ Բաղդասարյան Հ.Կ.-ն (ծնված՝ 1949թ.) եւ Սալենյան Ա.Ա.-ն (ծնված՝ 1978թ.) գտնվում են քաղաքի շտապ օգնության կլինիկական հիվանդանոցում: Նրանց վիճակը գնահատվում է որպես ծանր եւ միջին ծանրության, համապատասխանաբար: