Գերմանիայի արտգործնախարար Ֆրանկ–Վալտեր Շթայնմայերը կոչ է արել նախքան Իրաքի զինված ուժերի կողմից Մոսուլ քաղաքի ազատագրումը մտածել տարածաշրջանի վերականգնման մասին։ «Մենք պետք է արդեն հիմա պատրաստ լինենք իրադրության շուտափույթ կայունացմանը քաղաքում եւ տարածաշրջանում, եթե գործողությունը հաջողությամբ ավարտվի, եւ Մոսուլը ազատագրվի»,– ասել է նա Լյուքսեմբուրգում ԵՄ ԱԳ նախարարների հանդիպման ժամանակ, փոխանցում է DW–ն։
Շթայնմայերի խոսքով՝ անհրաժեշտ է պայմաններ ստեղծել քաղաքում բնակիչների նորմալ կյանքի ապահովման եւ փախստականներին վերադարձնելու համար։ «Փորձը ցույց է տալիս, որ կայունությանն ուղղված մեր ջանքերն առավել արդյունավետ են այնտեղ, որտեղ քաղաքացիական բնակչության մեծ մասը վերադառնում է իրենց տները դրանց ազատագրումից հետո»,– ասել է նախարարը եւ օրինակ բերել Թիքրիթ եւ Ռամադի քաղաքները։