Սիրիայում Ռուսաստանի կողմից զենիթահրթիռային Ս-300 եւ Ս-400 համալիրների տեղակայումը չափազանց նվազեցրել է այն հավանականությունը, որ ԱՄՆ նախագահ Բարաք Օբամայի վարչակազմը կսկսի ավիահարվածներ հասցնել Սիրիայի կառավարական օբյեկտներին: Այս մասին հայտնում է The Washington Post-ը:
Պարբերականը նշում է, որ Ռուսաստանի այս որոշումը նաեւ էական խոչընդոտ է դարձել Սիրիայում ոչ թռիչքային գոտիների ստեղծման հնարավորության համար, որի օգտին են հանդես գալիս ԱՄՆ նախագահի թեկնածուներ Հիլարի Քլինթոնը եւ Դոնալդ Թրամփը:
Ռուսաստանի հրթիռային համալիրները թույլ են տալիս խոցել օդանավերն ու թեւավոր հրթիռները առնվազն 250 մղոն (402 կմ) շառավղով, այդպիսով ծածկելով ամբողջ Սիրիայի, Թուրքիայի, Իսրայելի, Հորդանանի երկնքի զգալի մասը:
Պենտագոնի պաշտոնյան նշել է, որ իրենց չափազանց մտահոգում է Սիրիայի տարածքում համանման համակարգերի երեւան գալը: «Մենք համոզված չենք, որ մեր կործանիչներից որեւէ մեկը կարող է հաղթահարել Ս-300-ը»,- նշել է նա:
Օբամայի վարչակազմի մի քանի բարձրաստիճան պաշտոնյաներ կարծում են, որ Սիրիայում Ռուսաստանի ԶՀՀ-ների հայտնվելով ԱՄՆ պաշտպանության նախարարությունում վտանգավոր են համարում ԱՄՆ ավիացիայի ցանկացած կիրառում, նույնիսկ ոչ թռիչքային գոտիների սահմանների հսկողության նպատակով կատարվող թռիչքները, որտեղ խաղաղ բնակիչները կարող էին անվտանգության մեջ լինել: Նրանց կարծիքով՝ դա նույնիսկ կարող է պատերազմի հանգեցնել: