Ռուսաստանի վարչապետ Դմիտրի Մեդվեդեւը Եվրասիական տնտեսական հանձնաժողովի Կոլեգիայի ղեկավար Տիգրան Սարգսյանի հետ հանդիպմանը քննարկել է Եվրասիական տնտեսական միության միջկառավարական խորհրդին պատրաստվելու հարցը:
«Շուտով տեղի կունենա ԵՏՄ միջկառավարական խորհրդի նիստը, այժմ նախապատրաստվում են: Դրանով դուք եք զբաղվում եւ մեր գործադիր մարմնի ձեր գործընկերները: Ինչպե՞ս է գործերի վիճակը»,- հետաքրքրվել է վարչապետը:
Սարգսյանն ընդգծել է, որ օրակարգում ամենահրատապ հարցը շարունակում է մնալ ինտեգրման խթանումը: «Մենք փորձում ենք լրացուցիչ խթանիչներ գտնել, որոնք կկարողանային բացահայտել այն ամբողջ պոտենցիալը, որով մենք կկարողանայինք մեր երկրներին օգնել առաջին հերթին ներքին շուկայի արտադրանքի խթանման հարցում»,- ասել է նա՝ հավելելով, որ համապատասխան առաջարկներ են նախապատրաստվել:
Մեդվեդեւը նշել է, որ միջկառավարական խորհրդի նիստը մշտապես «աշխույժ է ընթանում, որի ընթացքում ստիպված են լինում երկար քննարկել ծառացած հարցերը եւ փոխզիջումներ գտնել»: Նա Սարգսյանին առաջարկել է ուշադրություն դարձնել բոլոր ուղղություններին, որպեսզի «լավ նախապատրաստվեն եւ այդպիսի հանդիպում կազմակերպեն»:
