Ռուսաստանն ու Վրաստանը շահագրգռված են շարունակել երկխոսությունը ռուս-վրացական կապերի աշխուժացման որոշակի հարցերի շուրջ։ Այս մասին հայտնել են ՌԴ փոխարտգործնախարար Գրիգորի Կարասինի ու Վրաստանի վարչապետի հատուկ ներկայացուցիչ Զուրաբ Աբաշիձեի հերթական աշխատանքային հանդիպման ընթացքում Պրահայում։

ՌԴ ԱԳՆ մամուլի ծառայության փոխանցմամբ հանդիպման ընթացքում շեշտվել է, որ Ռուսաստանում ու Վրաստանում վերջերս կայացած խորհրդարանական ընտրություններից հետո երկու կողմերն էլ շահագրգռված են շարունակել երկխոսությունը ռուս-վրացական կապերի աշխուժացման որոշակի հարցերի շուրջ այն ոլորտներում, որտեղ դիվանագիտական հարաբերությունների բացակայության պայմաններում հնարավոր է առաջընթաց՝ առեւտուր,տրանսպորտ, մշակութային, հումանիտար ոլորտներ։

Կողմերը հաստատել են երկկողմանի հարաբերությունների փուլային կարգավորման քաղաքական կուրսը շարունակելու պատրաստակամությունը։Կարասինն ու Աբաշիձեն պայմանավորվել են հաջորդ հանդիպումը անցկացնել 2017-ի սկզբին։