Մենք մեր հիվանդությունների, մեր վիճակի ախտորոշման կարիք ունենք: Այս մասին այսօր՝ հոկտեմբերի 20-ին, հայտարարել է վարչապետ Կարեն Կարապետյանը՝ ԱԺ-ում կառավարության ծրագիրը ներկայացնելիս պատասխանելով ընդդիմադիր պատգամավոր Խաչատուր Քոքոբելյանի հարցին:
Պատգամավորը նշել է, որ չնայած համաձայն է ծրագրի դրույթներին, բայց հարցեր ունի մենաշնորհների եւ ստվերային տնտեսության դեմ պայքարի հետ կապված: «Գրված է, որ ընդգծվում է այդ պայքարի կարեւորությունը, բայց նշված չէ, թե կոնկրետ եւ գործնական ինչ մեխանիզմներ կկիրառվեն»,- նշել է Քոքոբելյանը:
Ի պատասխան վարչապետն ընդգծել է մրցունակ պայմանների ապահովման կարեւորությունը: «Իմ տեսանկյունից, մեր ծրագրի հիմնական մասը հենց դրան է հանգում. երբ խոսում ենք հստակ եւ արդար, մրցունակ պայմանների մասին, ապա դրանց առկայությամբ մենաշնորհները, գերիշխող դիրքերը օբյեկտիվորեն են հնարավոր կամ ընդհանրապես անհնար են: Երբ մենք ասում ենք, որ օրինապահ գործարարը պետք է իրեն վստահ զգա, իսկ ոչ օրինապահը՝ ոչ, ամեն ինչ հենց դրան է ուղղված: Ավելի մանրամասն ներկայացնելը տրամաբանական չէր լինի»,- ասել է Կարապետյանը:
Խաչատուր Քոքոբելյանն այպես արձագանքեց. «Ակնհայտ է, որ թափանցիկ կառավարումը դրան կհանգեցնի : Խոսքն այլ բանի մասին է. օրինակ՝ ասվում է, որ Հայաստանը պաշարներ չունի, իսկ երկիրը մեծ պաշար ունի: Արժեր այս քաղաքական փաստաթղթում անդրադառնալ ստվերային տնտեսության դեմ պայքարի մանրամասներին, որն ավելի քան 30 տոկոս է կազմում»:
Կարեն Կարապետյանի խոստովանությամբ՝ գործերի իրական դրությունը վերաիմաստավորելու, վիճակագրական տվյալները ախտորոշելու անհրաժեշտություն կա: «Մենք մեր հիվանդությունների, մեր վիճակի ախտորոշման կարիք ունենք, մնացած բոլոր դատաղողությունները, որոնք հիմնված չեն լինի այդ ախտորոշման վրա, օդից են վերցված կլինեն, եւ վաղը մենք կսկսենք արդարանալ: Գուցե անհրաժեշտ էր գրել, որ ստվերի դեմ պայքարի համար անհրաժեշտ է այս կամ այն անել, ամեն դեպքում՝ մենք պատարստ ենք լսել պատգամավորների առաջարկները»,- ամփոփել է վարչապետը:
