Միայն ողջունելի կլիներ, եթե Մինսկի խմբի անդամները իրոք կառուցողական դեր կատարեին ղարաբաղյան կարգավորման գործընթացում։ Այս մասին ասել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով ղարաբաղյան կարգավորման հարցերով զբաղվող ԵԱՀԿ ՄԽ-ում Թուրքիայի հնարավոր ակտիվացման մասին հարցին։
«Ինչ վերաբերում է Թուրքիայի՝ որպես Մինսկի խմբի մասնակցի դերի փոփոխությանն ու ակտիվացմանը, ապա միայն ողջունելի կլիներ, եթե այդ խմբի անդամները իրոք կառուցողական դեր կատարեին կարգավորման գործում։ Իմ կարծիքով հենց դա է նրանց գործը՝ կառուցողական դեր կատարել ու ակտիվ լինել, երբ խոսքը կարգավորման գործընթացում հենց կառուցողական ավանդի մասին է»,- նշել է Զախարովան։
Պատասխանելով այն հարցին, արդյոք հնարավոր է, որ Թուրքիան դառնա ԵԱՀԿ ՄԻնսկի խմբի համանախագահներից մեկը, նա նշել է, որ այդ մասին որեւէ տեղեկություն չունի։ «Ես ոչ մի տեղեկություն չունեմ ԵԱՀԿ Մինսկի խմբի աշխատանքային ձեւաչափի փոփոխության մասին։ Անկեղծ ասած՝ ես նույնիսկ չեմ լսել, որ նման քննարկումներ են ընթանում։ Ես նկատի ունեմ, ոչ թե լրատվամիջոցները, այլ փորձագետներին, որոնք իրականում զբաղվում են այդ խնդրով»։
