Կուբանի հայկական կազմակերպությունները դիմում են հղել Կուբանի ուժային կառույցներին ու պաշտոնյաներին՝ կապված Կրասնոդարում դեռահաս Բագրատ Ասատրյանի դեմ կատարված հարձակման փաստի հետ:
«Ականատեսների եւ անցամբ տուժածի վկայությունները թույլ են տալիս վստահաբար պնդել, որ դեպքը տեղի է ունեցել կազմակերպված հանցավոր խմբավորման կողմից՝ ազգային ատելության հողի վրա: Ցավոք, պետք է արձանագրել, որ հերթական անգամ հասարակությանը փորձում են համոզել, որ սա ընդամենը խուլիգանություն է»,- ասված է հայերի դիմումում:
Հայկական կազմակերպությունների ղեկավարները նշել են, որ իրենց կարծիքով, Կրասնոդարի տարածքում գործող բոլոր արմատական եւ ազգայնական խմբավորումների մասին «քաջ հայտնի է ոչ միայն հասարակությանը, այլեւ իրավապահ մարմիններին»,- գրում է livekuban.ru-ն:
Դիմում-նամակն ուղղված է Կրասնոդարի գործադիր եւ օրենսդիր իշխանություններին, դատախազությանը, ինչպես նաեւ ՆԳ վարչությանն ու Անվտանգության դաշնային ծառայության մարզային կառույցին: Նամակի հեղինակները խնդրում են պատկան մարմիններին պարզել տեղի ունեցածը եւ պատժել մեղավորներին:
Դիմում-նամակը ստորագրել են «Ռուսաստանի հայերի միության» տեղի կառույցը, Կրասնոդարի «Պաշկովյան հայերի մշակութային կենտրոնը», «Երկրամաս» թերթի խմբագրությունը եւ «Խաչքար» ամսագրի խմբագրությունը, հաղորդում է «Երկրամասը»:
Ավելի վաղ NEWS.am-ը հայտնել էր, որ դեկտեմբերի 13-ին ժամը 19:15-ին (տեղի ժամանակով) Կրասնոդար քաղաքի կենտրոնում հարձակում է կատարվել ՌԴ քաղաքացի 16-ամյա Բագրատ Ասատրյանի վրա, ով զբոսնելիս է եղել իր ռուս ընկերների հետ:
Տղայի հոր խոսքով, ով 35 տարի է ապրում է Կրասնոդարում եւ ՌԴ քաղաքացի է, իր որդու վրա հարձակվել են 15-20 հոգանոց խմբով: Նրանք հային առանձնացրել են ընկերներից եւ սկսել են մահակներով ծեծել նրան: Հանցագործներից մեկն արդեն գետնին ընկած Բագրատին սկսել է դանակով հարվածներ հասցնել: Նրանք 16-ամյա տղային հանգիստ են թողել միայն այն ժամանակ, երբ վերջինս մեռած է ձեւացել: Տղայի կյանքը հնարավոր է եղել փրկել:
Տեղի ոստիկանությունը փաստի առթիվ քրեական գործ է հարուցել եւ փնտրում է վկաների:
