Դեռեւս նախորդ տարվա օգոստոսին BarCampArtsakh 2010-ի մասնակիցների հետ հանդիպումից հետո ԼՂՀ Ազգային ժողովի նախագահ Աշոտ Ղուլյանը խոստացավ, որ մեկ ամսից ԼՂՀ Ազգային ժողովը կունենա իր կայքէջը, սակայն մինչ օրս կայքէջը ստեղծված չէ: Այն պետք է դառնար օրենքների նախագծերի քննարկումների եւ կարծիքների արտահայտման հարթակ: Ա. Ղուլյանի խոսքով` ԱԺ կայքէջի միջոցով ԼՂՀ քաղաքացիները հնարավորություն կունենան հարցեր տալ եւ նամակներ ուղարկել ԼՂՀ Ազգային ժողովին:
ԼՂՀ Ազգային ժողովի լրատվական ծառայության ղեկավար Միքայել Հաջիյանը NEWS.am- Ինովացիայի թղթակցի հետ զրույցում ասաց, որ կայքէջի ստեղծման ուշացումը պայմանավորված է զուտ տեխիկական խնդիրներով՝ ծրագրավորում եւ այլն։
«Կայքէջի ստեղծման համար կոնկրետ ժամկետներ չկան, սակայն այն հնարավոր է պատրաստ լինի արդեն փետրվարին»,-ասաց Մ. Հաջիյանը՝ խորհուրդ տալով Ղարաբաղի վերաբերյալ ավելի լուրջ հարցերով զբաղվել։
Փաստորեն՝ տեղեկատվական ներկա դարում ԼՂՀ Ազգային ժողովի ղեկավարությունը կայքէջ ստեղծելն անլուրջ է համարում։