Հայաստան-Եգիպտոս չարտերային չվերթների ժամանակացույցում որեւէ փոփոխություն չի նշմարվում, քանի որ ներկայումս այդ երկրում հանգստանալ ցանկացող անձինք չեն հրաժարվում այցից: Այդ մասին NEWS.am-ին հայտնել են «Թեզ թուր» գործակալությունից՝ նկատելով, որ շարունակելու է չվերթներ իրականացնել Հայաստանից Եգիպտոս:
«Մեր զբոսաշրջիկներին հայտնի է այդ երկրում իրավիճակի մասին, եւ առ այսօր տոմսերից հրաժարվել է միայն մեկ մարդ: Խուրգադայի եւ Շարմ-էլ-Շեյխի առողջարաններում հանգստացող զբոսաշրջիկները չեն ահազանգել Եգիպտոսում անկայուն իրավիճակի կապակցությամբ: Սովորաբար, երբ մեր զբոսաշրջիկներն ինչ-որ բանից դժգոհ են, նրանք ոչ միայն զանգում են, այլեւ հայտնում են իրենց դժգոհությունը Հայաստանում գտնվող ազգականների միջոցով: Առայժմ ոչ ոք չի բողոքել»,- նշեցին տուրիստական գործակալությունում:
«Տրիումֆ», «Ալո», «Թռիչք», «Էյ Էլ Թրեվլ» տուրիստական գործակալություններում հայտնեցին, որ իրենց միջոցով Եգիպտոս մեկնած զբոսաշրջիկները նույնպես չեն կապվել եւ դժգոհել Եգիպտոսի ներքաղաքական անկայուն վիճակից:
Գործակալությունները նշեցին նաեւ, որ Եգիպտոսում հանգստանալ ցանկացողները չեն նվազել, եւ արդեն փետրվարի 6-ին կայանալու է հաջորդ չարտերային թռիչքը դեպի փարավոնների երկիր:
Ինչպես ավելի վաղ հայտնել է NEWS.am-ը, Շարմ-էլ-Շեյխ քաղաքում 164 հայ զբոսաշրջիկ կա:
Եգիպտոսի հայ համայանքը կազմում է 8,5 հազար: Հայաստանի ԱԳՆ-ն պարբերաբար տեղեկություններ է ստանում Կահիրեում Հայաստանի դեսպանատնից, որտեղ թեժ գիծ է գործում:
Վերջին տվյալներով, Եգիպտոսում խռովությունների արդյունքում զոհվել է 150 մարդ, եւս 4 հազարը վնասվածքներ են ստացել:
