Իրանի հեղափոխական շարժման երկու առաջնորդներ Միր-Հոսեյն Մուսավին եւ Մեհդի Քարուբին հայտարարել են, որ ղեկավարությունից պահանջում են, որպեսզի իրենց թույլ տան, փետրվարի 14-ին, Թեհրանում, երթ կազմակերպել Իմամ Հուսեյնի հրապարակից մինչեւ Ազատության հրապարակ, ի նշան Եգիպտոսի ժողովրդի համերաշխության: Չնայած նրան, որ Իրանի ղեկավարությունը դեռ չի պատասխանել հեղափոխականներին, Իրանի ժողովուրդն արդեն պատրաստվում է փետրվարի 14-ին բողոքի ցույցինր, հայտնում է Iran.ru-ն:
Այս ամենի հետ, Facebook սոցիալական ցանցում, հատուկ էջ է բացվել` նվիրված փետրվարի 14-ին (ըստ իրանական օրացույցի այդ օրը համընկնում է Բահման ամսվա 25-րդ օրվա հետ): Վերջին տվյալներով, այդ էջում արդեն գրանցվել է 20 հազար օգտագործող:
Թեհրանի համալսարանի մի շարք դասախոսներ կոչ են արել Իրանի ուսանողներին եւ ժողովրդին,մասնակցել փետրվարի 14-ին կայանալիք բողոքին: Դասախոսները փետրվարի 14-ը անվանել են Իրանի ժողովրդի քննության օր, տեղեկացնում է SalamNews-ը:
Ինչպես, ավելի վաղ հայտնել է NEWS.am –ը, Իրանի ղեկավարությունը, տնային կալանքի է ենթարկել Իրանի ընդդիմության առաջնորդ Մեհդի Կյարուբիին`Եգիպտոսի բողոքականներին աջակցելու եւ ցույցի կոչ անելու համար:
Թեհրանում, Կյարուբիի տան մոտ կանգնած են անվտանգության դիտակետեր, որոնք ընդդիմադրի մոտ չեն թողնում անգամ նրա բարեկամներին: Նման սահմանափակումները կշարունակվեն մինչեւ փետրվարի 14-ը:
