ԵԱՀԿ Մինսկի խումբը մեծ ճանապարհ է անցել եւ խիզախություն է դրսեւորել, որպեսզի հաշտեցնի ղարաբաղյան հակամարտության կողմերին, նաեւ բազում առաջարկներ է արել: Այդ մասին NEWS.am-ի թղթակցի հետ զրույցում հայտնել է ընդդիմադիր Հայ ազգային կոնգրեսի կենտրոնական գրասենյակի ներկայացուցիչ Վլադիմիր Կարապետյանը` մեկնաբանելով Մինսկի խմբի գործունեությունը:
Մինսկի խմբի կարեւորագույն ձեռքբերումն, ըստ Կարապետյանի, 1994թ. եւ 1995թ. ստորագրված համաձայնագրերն են` հրադադարի ռեժիմի հաստատման եւ միջադեպերի կանխման վերաբերյալ:
Սակայն ՄԽ-ն կարող էր ավելի հետեւողական լինել այդ փաստաթղթերի դրույթները մեկնաբանելու հարցում, կարծում է Կարապետյանը: «Ցավոք, Սերժ Սարգսյանն սկսեց փաստաթղթեր ստորագրել առանց Լեռնային Ղարաբաղի մասնակցության, այդկերպ, միանշանակ ուժեղացնելով Ադրբեջանի դիրքերը, որը պնդում է, թե հակամարտությունն ընթանում է Հայաստանի եւ Ադրբեջանի, այլ ոչ Լեռնային Ղարաբաղի եւ Ադրբեջանի միջեւ: Այդուհանդերձ, ես կարծում եմ` դեռ ուշ չէ վերադառնալ այդ փաստաթղթերին, որոնք կարող են հիմք ծառայել հրադադարի ռեժիմի ամրապնդման համար»,- նկատել է Կարապետյանը:
Հիշեցնենք, որ 1992թ. մարտի 24-ին ստեղծվեց ղարաբաղյան հակամարտության կարգավորման ԵԱՀԿ Մինսկի խումբը: