Հայաստանի աշխատանքի եւ սոցիալական հարցերի նախարարությունը մտադիր է խիստ պայքար մղել կոռուպցիայի դեմ: Այդ մասին մարտի 28-ին կայացած ասուլիսում հայտարարել է նախարար Արթուր Գրիգորյանը եւ հավելել, որ կենսաթոշակների վճարման գործընթացը դառնալեւ է ավելի թափանցիկ ու հասկանալի:
Նախարարը ձեւակերպել է Սոցիալական ապահովության պետական ծառայության աշխատանքի նոր բանաձեւը. «Կա կենսաթոշակառու, կլինի վճարում, չկա կենսաթոշակառու, չի լինի վճարում»:
«Ձեւավորելու ենք միասնական տեղեկատվական համակարգ, որի միջոցով փորձելու ենք կարգավորել մահացած կենսաթոշակառուի վերաբերյալ տեղեկատվությունը` քաղաքացիական կացության ակտերի գրանցման համակարգի տեղեկատվական բազայից առցանց ստանալու ենք, եւ մեր բազայում արդեն հստակ կֆիքսվի, որ կենսաթոշակառուն մահացած է եւ կդադարեցվի նրա կենսաթոշակի վճարումը», - պարզաբանեց նախարարը:
Լրագրողները նախարարից եւ Սոցիալական ապահովության պետական ծառայության պետ Արտեմ Սարգսյանից հետաքրքրվել են, թե որ կազմակերպություններն են խախտումներ կատարել: Այդ մասին կառավարության նախորդ շաբաթ կայացած նիստում ասել էր վարչապետ Տիգրան Սարգսյանը:
Պաշտոնյաները խուսափել են նշել օրինախախտ ընկերությունների անունները, սակայն խոստացել են ճշտել տվյալները, պարզել «մեռած հոգիների» կողմից տարիներ շարունակ թոշակներ ստանալու փաստերը եւ կարճ ժամկետում դրանք ուղարկել դատախազություն:
Նշենք, որ ավելի վաղ Արտեմ Ասատրյանը «Ազատություն» ռադիոկայանի հետ զրույցում ասել էր, որ վճարահաշվարկային երկու կազմակերպության` «Ադալեւ Ռիա» եւ «Մեգա Պանտերա» ընկերությունների ներկայացրած ցուցակներում են հայտնաբերվել մահացած կենսաթոշակառուների անուններ:
