Հայաստանում 2009թ.-ին պոռնկագրական առարկաներ տարածելու 10 դեպք է գրանցվել, իսկ 2010թ.-ին նման դեպքերի թիվը կիսով չափ կրճատվել է, գրանցվել է ընդամենը 5 դեպք։ Այս մասին NEWS.am-ի հարցմանն ի պատասխան հայտնել են Հայաստանի ոստիկանության հասարակայնության հետ կապի եւ լրատվության վարչությունից։
Ըստ Հայաստանի ոստիկանության ԿՀԴՊ գլխավոր վարչության Բարձր տեխնոլոգիաների ոլորտում կատարվող հանցագործությունների դեմ պայքարի բաժնի կողմից 2009-ին գրանցված եւ բացահայտված հանցագործությունների վիճակագրության` Հայաստանում այս ոլորտում գրանցվել է զրպարտության, ապօրինի ձեռնարկատիրության եւ համակարգչային տեղեկատվությանն ապօրինի տիրանալու մեկական դեպք, խարդախության 2, իսկ պոռնկագրական առարկաներ տարածելու 10 դեպք։
2010թ.-ին պոռնկագրական առարկաներ տարածելու դեպքերի թիվը նվազել է, հասնելով 5-ի, սակայն աճել են վնասաբեր ծրագրեր մշակելու, օգտագործելու կամ տարածելու դեպքերը, գրանցվել է նմանատիպ 4 դեպք։
2011թ.-ի առաջին եռամսյակի դրությամբ, գրանցվել է համակարգչային տեղեկատվությանն ապօրինի տիրանալու եւ խարդախության ընդամենը մեկական դեպք։
