Հայտնի կոմպոզիտոր Ռոբերտ Ամիրխանյանը մրցանակի է արժանացել 2011 թ. «Համագործակցության աստղեր» միջպետական մրցանակաբաշխության «Հումանիտար գործունեություն» անվանակարգում: Ռ. Ամիրխանյանը Հայաստանի եւ ԽՍՀՄ ժողովրդական արտիստ է, «Սուրբ Մեսրոպ Մաշտոց» շքանշանակիր, Հայաստանի կոմպոզիտորների միության նախագահ:
NEWS.am-ի թղթակցի հետ զրույցում Մշակույթի նախարարության մամուլի ծառայության ղեկավար Գայանե Դուրգարյանը նշեց, որ այս մրցույթին մասնակիցներ ներկայացնում է պետությունը, մասնավորապես` Մշակույթի նախարարությունը, բայց ընտրությունը կատարվում է Ռուսաստանում:
NEWS.am-ը փորձեց զրուցել նաեւ Ռոբերտ Ամիրխանյանի հետ, բայց կոմպոզիտորն ասաց, որ այժմ գտնվում է Մոսկվայում եւ կվերադառնա երկու օրից:
Հիշեցնենք, որ ԱՊՀ մասնակից երկրների Հումանիտար համագործակցության միջպետական հիմնադրամի ծրագրերի շրջանակներում` 2010 թ. մեկնարկել է «Համագործակցության աստղեր» միջպետական մրցանակաբաշխությունը: 2010 թ. «Համագործակցության աստղեր» միջպետական մրցանակաբաշխության «Մշակույթ» անվանակարգում մրցանակը հանձնվել էր աշխարհահռչակ դուդուկահար Ջիվան Գասպարյանին: