Ողջ աշխարհի հայությունն այսօր` ապրիլի 24-ին նշում է Օսմանյան Թուրքիայում Հայոց ցեղասպանության 96-րդ տարելիցը (Ֆոտոռեպորտաժ): 1915 թ. այդ օրը Օսմանյան կայսրության ղեկավարության հրամանով սկսվեցին հայերի ջարդերն ու զանգվածային տեղահանումը: Այդ գազանաբարո գործողությունների զոհ դարձավ ավելի քան 1,5 մլն մարդ:
Հիշատակի արարողություններ տեղի են ունենում աշխարհի գրեթե բոլոր երկրներում, որտեղ հայեր կան: Երեւանում ապրիլի 24-ի վաղ առավոտից անմեղ նահատակների հիշատակը հավերժացնող եւ հայ ժողովրդի վրածննունդը խորհրդանշող Ծիծեռնակաբերդի հուշահամալիր են ուղղվում տասնյակ հազարավոր մարդիկ. գալիս են ընտանիքներ, կազմակերպություններ, հասարակական եւ քաղաքական գործիչներ, բոլոր նրանք, ովքեր անտարբեր չեն հայ ժողովրդի վշտի նկատմամբ: Սփյուռքի շատ ներկայացուցիչներ այդ օրը հատուկ ժամանում են Հայաստան` մասնակցելու դեպի Ծիծեռնակաբերդի բարձունք ձգվող երթին:
Հայաստանի նախագահ Սերժ Սարգսյանը նույնպես տիկնոջ հետ առավոտյան այցելում է Ծիծեռնակաբերդ: Երկրի ղեկավարին, ակնկալվում է, որ կուղեկցեն Գարեգին Բ-ն, ԱԺ նախագահ Հովիկ Աբրահամյանը, վարչապետ Տիգրան Սարգսյանը, նախարարներ, խորհրդարանի պատգամավորներ, երկրի ռազմական ղեկավարությունը, Հայաստանում հավատարմագրված դիվանագետներ, հայկական սփյուռքի ներկայացուցիչներ, բազմաթիվ հյուրեր:
♦Երեւանում մեկնարկեց ջահերով երթը (վիդեո)
Հիշեցնենք, որ Առաջին համաշխարհային պատերազմի ընթացքում Թուրքիայի իշխանությունները Ռուսաստանի նկատմամբ hայերի ցուցաբերած համակրանքն օգտագործեցին որպես պատրվակ` ողջ հայ բնակչությանը երկրի ներքին թշնամի հայտարարելու համար: 1915 -1923թթ. իրադարձությունները շատ պատմաբանների կողմից գնահատվել են որպես պետության աջակցությամբ իրագործված զանգվածային սպանություն` ցեղասպանություն: Հայաստանում հայտարարում են, որ սպանվել է ավելի քան 1,5 մլն մարդ: Անցած դարասկզբին դա կազմում էր ողջ հայության կեսը:
♦ Լոս-Անջելեսում ամերիկահայերը ցույց են արել Բարաք Օբամայի դեմ (վիդեո)
Ցեղասպանության փաստը ճանաչել են մի շարք պետություններ: Այն առաջինը ճանաչել է Ուրուգվայը` 1965թ-ին, որի օրինակին հետեւել են Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեյցարիան, Շվեդիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ 42 նահանգներ: Ցեղասպանությունը ճանաչել են նաեւ Վատիկանը, Եվրախորհրդարանը, Եկեղեցիների համաշխարհային միությունը:
Հայոց ցեղասպանության փաստը ճանաչող բանաձեւի նախագիծը հաստատել է ԱՄՆ Ներկայացուցիչների պալատի միջազգային հարցերի հանձնաժողովը:
