Ղարաբաղի ստատուս-քվոն դեռ երկար ժամանակ կպահպանվի, հակամարտությունն էլ՝ սառեցված կմնա։ Այս մասին այսօր` ապրիլի 27-ին ասուլիսում հայտարարել է Սանկտ Պետերբուրգի պետական համալսարանի պրոֆեսոր Վալերի Աչկասովը, ով Երեւանում մասնակցել է «Հայ-թուրքական հարաբերությունները, դրանց ազդեցությունը տարածաշրջանի աշխարհաքաղաքական զարգացմա վրա եւ դրանց արտացոլումը մամուլում» միջազգային համաժողովին:
«Ղարաբաղյան հակամարտության կարգավորման գործընթացում որոշակի սրացումներ ժամանակ առ ժամանակ հնարավոր են, սակայն լայնամասշտաբ պատերազմական գործողությունները դժվար թե լինեն. այս հակամարտությունը ռազմական ճանապարհով չի կարող լուծվել»,- համոզմունք հայտնեց պրոֆեսորը։
Վալերի Աչկասովը տեղեկացրեց, որ միջազգային համաժողովի շրջանակներում բացի ղարաբաղյան հարցից քննարկվել են նաեւ հայ-թուրքական հարաբերություններին առնչվող հարցեր։
Սանկտ Պետերբուրգի պետական համալսարանի պրոֆեսորը հատկանշական համարեց, որ համաժողովը տեղի է ունեցել Հայոց ցեղասպանության 96-ամյա տարելիցի օրերին։ Պրոֆեսորի գնահատականներով, համաժողովը բավական հաջողված էր, քանի որ դրա ժամանակ քննարկվել են ինչպես պատմական, այնպես էլ հայ-թուրքական հարաբերությունների ներկայիս վիճակին վերաբերող արդիական հարցեր։
«Սա այն դժվար գործընթացներից է, որոնց միջազգային հանրությունը չգիտի՝ ինչ լուծումներ կարող է առաջարկել, մանավանդ որ հայ-թուրքական հարաբերությունների կարգավորմանը խոչընդոտող շատ հարցեր կան։ Կարծում եմ՝ հարցը չի լուծվի նաեւ Թուրքիայում այս տարի կայանալիք խորհրդարանական ընտրություններից հետո»,- կարծիք հայտնց ռուս պրոֆեսորը։
Լրագրողներից մեկի հարցին, թե կարո՞ղ են ռուս-թուրքական տնտեսական հարաբերությունները մի օր վերաճել ռազմավարական գործընկերության, Սանկտ Պետերբորգի պետական համալսարանի պրոֆեսոր Վալերի Աչկասովը եւ նրա գործընկեր Վլադիմիր Գուտորովը միաձայն նշեցին, որ գոնե մոտ ապագայում՝ ոչ։ «Թուրքիան ՆԱՏՕ-ի անդամ է, եւ Ռուսաստանի հետ ռազմավարական ոլորտում համագործակցությունը գրեթե անհնար է։ Նման հիմքեր առայժմ չկան»,- համոզմունք հայտնեցին պրոֆեսորները:
Նշենք, որ «Հայ-թուրքական հարաբերությունները, դրանց ազդեցությունը տարածաշրջանի աշխարհաքաղաքական զարգացմա վրա եւ դրանց արտացոլումը մամուլում» միջազգային համաժողովը Հայ-ռուսական համալսարանում տեղի էր ունեցել օրեր առաջ։