Երեւանում ավարտվել է զբոսավարների պատրաստման առաջին տարածաշրջանային դասընթացը, որին մասնակցել են 11-ական զբոսավարներ Հայաստանից եւ Վրաստանից: Երեւանի ընտրությունը պայմանավորված է նրանով, որ երեք հայ զբոսավարներ տարածաշրջանում միակն են, որ Զբոսավարների միությունների համաշխարհային ֆոդերացիայից (WFTGA) հավաստագրված են որպես դասավանդողներ;
Դասընթացներին մասնակցել է նաեւ WFTGA փոխնախագահ Ֆելիսիտաս Վրեսլինգը: Այսօր` մայիսի 6-ին հրավիրած ասուլիսում տիկ. Վրեսլինգն ասաց, որ դասընթացների մասնակիցները կստանան սերտիֆիկատներ, սակայն այդ սերտիֆիկատները այլ երկրներում աշխատելու իրավունք չեն տալիս: Այնուամենայնիվ` դասընթացն անցած զբոսավարները որակավորման ավելի բարձր աստիճան կունենան, ինչը նրանց թույլ կտա զբոսաշրջիկներ սպասարկել ավելի բարձր վարձավճարով, կամ էլ ուսուցանել այլ զբոսավարների:
Ըստ էկոնոմիկայի նախարարության զբոսաշրջության վարչության պետ Մեխակ Ապրեսյանի`Հայաստան այցելող զբոսաշրջիկների թիվն ավելանում է, ինչն այդ մասնագիտության մարդկանց նկատմամբ հավելյալ պահանջարկ է ստեղծում:
Նշենք, որ դասընթացն անց է կացվել Հայ զբոսավարների գիլդիայի կողմից` «Գերմանական միջազգային համագործակցություն» ընկերության (GIZ) հայաստանյան գրասենյակի եւ ԱՄՆ Միջազգային զարգացման գործակալության Վրաստանի «Տնտեսական զարգացման նախաձեռնություն» ծրագրի օժանդաակությամբ:
