Նիդերլանդների Թագավորությունում Հայաստանի դեսպան Ձյունիկ Աղաջանյանն օգոստոսի 26-ին իր հավատարմագրերն է հանձնել Քիմիական զենքի արգելման կազմակերպության (ՔԶԱԿ) գլխավոր տնօրեն Ահմեդ Ուզումչուին:
ԱԳՆ մամուլի ծառայությունից NEWS.am-ին հայտնում են, որ կայացած զրույցի ժամանակ գլխավոր տնօրենը բարձր է գնահատել ՔԶԱԿ-Հայաստան համագործակցության մակարդակը` նշելով, որ Հայաստանը գերազանցապես կատարել է կոնվենցիայով ստանձնած պարտավորությունները: Նա բարձրացրել է այն հարցերը, որոնք դեռեւս իրավական կարգավորման կարիք ունեն ՔԶԱԿ տեսանկյունից:
Զրույցի ընթացքում Ուզումչուն ներկայացրել է կազմակերպության առջեւ ծառացած խնդիրները` մասնավորապես նշելով, որ ընթանում է բարեփոխումների գործընթաց, որի հաջողությունը կախված է բոլոր անդամ պետությունների ակտիվ մասնակցությունից:
Դեսպան Աղաջանյանը, ներկայացնելով կոնվենցիայի դրույթների իրագործման ուղղությամբ Հայաստանում կատարված քայլերը, ընդգծել է զանգվածային ոչնչացման զենքերի տարածման դեմ պայքարում միջազգային ու տարածաշրջանային համագործակցության կարեւորությունը, կանխարգելիչ միջոցառումների եւ արդի մարտահրավերներին դիմագրավելու հարցում ճկուն մեխանիզմների մշակման անհրաժեշտությունը:
