Բելառուսի նախագահ Ալեքսանդր Լուկաշենկոն խնդրել է ռուս տիեզերագնաց Օլեգ Նովիցկուն ՄՏԿ-ում հետեւել բելառուցի Մարինա Վասիլեւսկայային, որպեսզի ամերիկացիները չառեւանգեն նրան Միջազգային տիեզերակայանի իրենց հատվածում։
Հրթիռի մեկնարկը նախատեսված է մարտի 21-ին։ «Սոյուզ МС-25» տիեզերանավի հիմնական կազմում են ռուս տիեզերագնաց Օլեգ Նովիցկին, Բելառուսից Մարինա Վասիլեւսկայայն եւ ամերիկուհի Թրեյսի Դայսոնը։ Նովիցկին եւ Վասիլեւսկայան ՄՏԿ-ում կանցկացնեն 12 օր եւ Երկիր կվերադառնան «Սոյուզ МС-24» նավով։
«Օլեգ, ես քեզ խնդրում եմ (տիեզերակայանում ամերիկյան հատված կա, չէ՞)՝ տես, որ ամերիկացիները նրան այնտեղ չառեւանգեն-տանեն իրենց սեգմենտ»,- Լուկաշենկոյի խոսքերը մեջբերել է նրա մամուլի ծառայությունը Նովիցկու եւ Վասիլեւսկայայի հետ տեսակոնֆերանսի ձեւաչափով հանդիպման ժամանակ։
Նովիցկին ի պատասխան խոստացել է, որ Վասիլեւսկայան ամերիկյան սեգմենտ կմտնի միայն հրամանատարի հետ։ «Այո, այո, ես քեզ շատ եմ խնդրում։ Անձամբ հետեւիր։ Նա մեզ հետո Երկրի վրա պետք է»,- պատասխանել է Բելառուսի նախագահը։ Նա տեղեկացրել է, որ բելառուսցի աղջիկները գեղեցիկ են։ «Մեր աղջիկները գեղեցիկ են։ Որ ամերիկացիներն այնտեղ չնայեն նրանց վրա»,- կես-կատակ նշել է Բելառուսի նախագահը։