ՄԱԿ Կլիմայի գործակալության ղեկավարը հայտնել է, որ մարդկությունը երկու տարի ունի կլիմայական աղետներից «աշխարհը փրկելու» համար, տեղեկացրել է «Голос Америки»-ն։
Սայմոն Սթիլը արմատական փոփոխությունների կոչ է արել, որպեսզի սահմանափակվեն ջերմոցային գազերի արտանետումները, եւ որպեսզի ընդունվեն ֆինանսական որոշումներ, որոնցում առաջնահերթ ուշադրություն կհատկացվի կլիմային։
ՄԱԿ կլիմայի փոփոխության Շրջանակային կոնվենցիայի գործադիր քարտուղար Սթիլը հայտնել է, որ հասկանում է, որ այս նախազգուշացումը կարող է մելոդրամատիկ թվալ, բայց եւ այնպես, չափազանց կարեւոր է միջոցներ ձեռնարկել։
«Ո՞վ հատկապես ունի այդ երկու տարին, որպեսզի փրկի աշխարհը։ Պատասխան. յուրաքանչյուր մարդ այս մոլորակի վրա,- ասել է նա։- Ավելի ու ավելի շատ մարդիկ (որոնք ներկայացնում են տարբեր հասարակություններ եւ քաղաքական տարբեր ուղղոթւյուններ) են ցանկանում, որպեսզի միջոցներ ձեռնարկվեն կլիմայի վերաբերյալ, որովհետեւ նրանք զգում են կլիմայական ճգնաժամի ազդեցությունն իրենց առօրյա կյանքի եւ իրենց ընտանեկան բյուջեի վրա»։
Նախազգուշացումը, մասնավորապես, հասցեագրված է «Մեծ քսանյակի» երկրներին, որի մեջ են մտնում զարգացած եւ զարգացող տնտեսությունները, ինչպիսին են ԱՄՆ-ն, Չինաստանը եւ Հնդկաստանը։
Այդ երկրներին բաժին է ընկնում ջերմոցային գազերի արտանետումների 80 տոկոսը, ինչը, Սթիլի կարծիքով, պետք է ստիպի նրանց կենտրոնական դեր խաղալ հետեւանքների մեղմման նախագծերում։
