Հայաստանում Գերմանիայի դեսպան Հանս-Յոխեն Շմիդտը, հնարավոր է, առաջիկայում կայցելի Սյունիքի մարզի Քաջարան գյուղ: Այդ մասին, ըստ «Էկոլուրի», նա ասել է հասարակական կազմակերպությունների ներկայացուցիչների հետ հանդիպման ժամանակ: Դեսպանի հետ հանդիպել են Սամվել Հովհաննիսյանը («Հեծանիվ +»), Սոնա Այվազյանը (Transparensy International) եւ Ինգա Զառաֆյանը («Էկոլուր»):
Դեսպանն անհանգստություն է հայտնել Քաջարան գյուղում ստեղծված իրավիճակի կապակցությամբ` կապված ՀՀ կառավարության ապրիլի 28-ի 627-Ն որոշման հետ, որի համաձայն` գյուղի հողերը տրվում մեն Զանգեզուրի պղնձամոլիբդենային կոմբինատին:
Նշենք, որ կոմբինատի հիմնական բաժնետերը գերմանական «Քրոնիմետ Մայնինգ» ընկերությունն է:
Արդեն մի քանի ամիս է, Քաջարան գյուղը պահանջում է չեղյալ համարել ՀՀ կառավարության 627-Ն որոշումը եւ հրաժարվում է ստորագրել հողերի հանձնման փաստաթուղթը` հայտարարելով, որ դա ամբողջ գյուղի ստիպողաբար տարհանում է նշանակում:
Ավելի վաղ NEWS.am-ը հայտնել էր, որ Քաջարանի պղնձամոլիբդենային կոմբինատի սեփականատեր, գերմանական «Քրոնիմետ Մայնինգ» ընկերությունը պատրաստ է քննարկել գյուղացիների բողոքներն ու առաջարկությունները, սակայն չի հրաժարվի հանքը ընդլայնելու ծրագրից:
Քաջարանի գյուղապետ Ռաֆիկ Աթայանը հրաժարական է տվել գյուղապետի պաշտոնից եւ հրաժարվել Հայաստանի հանրապետական կուսակցության անդամությունից: