Հայաստանը 2011 թ. ներմուծել է 33.6 հազ. տոննա միրգ, արտահանել` 15.3 հազ. տոննա: Այսպիսով` մրգի արտահանումը ավելի քան 2 անգամ զիջում է ներմուծմանը:
Նշենք, որ մրգի արտահանման ամենաբարձր մակարդակ Հայաստանը գրանցել է 2009 թ.` 17 հազ. տոննա:
Դեռեւս 2011 թ. նոյեմբերին ՀՀ կառավարությունը որոշեց ստեղծել «Հայկական միրգ» ընկերությունը ` այդ նպատակով հատկացնելով 1.7 մլն դոլար: Ընկերության հիմնական նպատակն է լինելու` ընդլայնել հայկական մրգի արտահանումը, օգնելու գյուղացիներին` մրգի ու ընկուզեղենի առավել որակյալ սորտեր աճեցնել, հիմնել բարձր ինտենսիվության այգիներ եւ այլն:
Սակայն դատելով գործընթացներից` «Հայկական միրգ» ընկերության ստեղծումը ձգձգվում է: ՀՀ կառավարության փետրվարի 23-ի նիստի օրակարգում է հայտնվել հարց` ընկերության ստեղծման մասին որոշման մեջ որոշ փոփոխություններ կատարելու վերաբերյալ:
Նախ` ձգձգվել են Գյուղատնտեսության զարգացման միջազգային հիմնադրամի հետ բանակցությունները, որի հետ պետք է համաձայնեցվի ընկերության կանոնադրությունը: Այդ համաձայնեցումը կատարվել է միայն դեկտեմբերի կեսերին, պայմանով, որ «Հայկական միրգ» ընկերության տնօրենների խորհրդի կազմում ընդգրկվող այգեգործության ոլորտի մասնավոր սեկտորի ներկայացուցիչների թիվն ավելացվի:
Իսկ գյուղատնտեսության նախարարությունը չի պահպանել շենք եւ հողամաս տրամադրելու վերաբերյալ առաջարկություն ներկայացնելու ժամկետները: Այդ ժամկետը հավանաբար կտեղափոխվի մինչեւ մարտի 15-ը:
