ՄԱԿ-ի Անվտանգության խորհուրդը պատրաստվում է Սիրիա ուղարկել միջազգային դիտորդական խումբ: Բանաձեւի նախագիծը քննարկվել է կազմակերպության Նյու Յորքի գրասենյակում:
ՄԱԿ-ում Ռուսաստանի մշտական ներկայացուցիչ Վիտալի Չուրկինը հաղորդել է, որ առաքելությանը նաեւ ռուս դիվանագետ կմասնակցի, հաղորդում է ՆՏՎ-ն:
AP-ը տեղեկացնում է, որ բանաձեւի տեքստի համաձայն` կառավարությունը կպարտավորվի ապահովել երկրում դիտորդների անխոչընդոտ շրջագայությունը եւ անձամբ ցանկացած մարդու հարցաքննելու իրավունքը:
Բացի այդ, ԱՄՆ-ի առաջարկած բանաձեւում սիրիական կառավարությանը կոչ է արվում զորքերը դուրս բերել բնակավայրերից ու քաղաքներից:
Սիրիայի կողմից պայմանը չկատարվելու դեպքում կքննարկվեն հետագա միջոցառումները:
ՄԱԿ-ի հատուկ պատվիրակ Քոֆի Անանը հայտարարել է, որ Դամասկոսը մինչեւ վերջ չի իրականացրել Սիրիայում իրավիճակի կարգավորման իր ծրագիրը: Անանը Անվտանգության խորհրդին կոչ է արել հնարավորինս ազդել Դամասկոսի վրա, որպեսզի վերջինս սիրիական քաղաքներից դուրս բերի ռազմական տեխնիկան: