Հայտնի հեռուստահաղորդավարուհի Քսենիա Սոբչակը, որը մեկնել էր Աստրախան աջակցելու հացադուլավորներին, իր միկրոբլոգում բողոքել է, որ LifeNews-ի լրագրողներն իրեն հետապնդում են նաեւ այնտեղ:
«Գնացի տաքսիստների գործադուլին: Գաբրելյանովի Լայֆնյուզն ինձանից ոչ մի քայլ հետ չի մնում», - գրել էր նա:
Հայտնի ռուս բլոգեր Danila Lindele-ն իր հերթին հայտնւոմ է, որ հրատարակչության լրագրողները «վիճում են Նավալնիի եւ Յաշինի հետ, նեղանում են, որ իրենց ոչ մի տեղ չեն տանում», հայտնում է «Ռոսբալտը»:
Ինչպես ավելի վաղ հայտնել էր NEWS.am-ը, Սոբչակի եւ LifeNews-ի միջեւ սկանդալը բռնկվել էր այն բանից հետո, երբ News Media հոլդինգի նախագահ Աշոտ Գաբրելյանովը ՆԳՆ-ի Մոսկվայի ԳՎ-ում բողոքել էր Սոբչակի, ինչպես նաեւ ընդդիմադիրներ Իլյա Յաշինի եւ Անաստասիա Օգնեւայի դեմ, որոնց մեղադրել էր հրատարակության երկու աշխատակիցների վրա հարձակման մեջ:
Լրագրող Նաստյա Կոնովալովան պատմել էր ղեկավարին, որ իրենցից խլել էին կրիչը, ջարդել խցիկը: Դեպքը տեղի էր ունեցել Տվերի ճեմուղու ռեստորանի մոտ: Խոսքը գնում է «Տվերբուլ» ռեստորանի մասին, որը բացել էր Սոբչակը 2011 թվականին: Յաշինի եւ Սոբչակի դեմ քրեական գործ է հարուցվել ուրիշի գույքի կանխամտածված ոչնչացման առնչությամբ:
Սոբչակը մտադիր է պատասխան հայց ներկայացնել News Media-ի գործադիր տնօրեն Աշոտ Գաբրելյանովի դեմ: Հայցի առարկա պետք է դառնա «լրագրողներին ծեծելու վերաբերյալ ի սկզբանե սուտ հերյուրանքը»:
