Հայաստանը պատրաստվում է դառնալ Եվրամիության ասոցիացված անդամ: Ինչպես NEWS.am-ի թղթակցի հետ զրույցում նշեց բարձրաստիճան եվրոպացի մի դիվանագետ, որ ցանկացավ գաղտնի մնալ, Եվրամիությանը Հայաստանի ասոցիացված անդամության բանակցությունները կսկսվեն արդեն 2010թ. եւ դժվար թե երկար ձգվեն, քանի որ այդ հարցում ԵՄ-ն Հայաստանի նկատմամբ հատուկ խնդիրներ չունի:
Նա նաեւ հայտնեց, որ 2010թ.-ին բանակցություններ են սկսվելու հարեւան Վրաստանի հետ: Նրա խոսքով, Վրաստանը եւս հատուկ խնդիրներ չունի: Որոշակի դժվարություններ ունի Ադրբեջանը, քանի որ այդ երկիրը Առեւտրի համաշխարհային կազմակերպության անդամ չէ: Սակայն, ինչպես նկատեց դիվանագետը, ԵՄ-ն պետք է այնպիսի լուծման հասնի, որը թույլ կտա երեք հանրապետություններին միաժամանակ դառնալ Եվրամիության ասոցիացված անդամ: Նա հատուկ նշեց, որ ԵՄ-ին ասոսցիացված անդամությունը փաստացի չի տարբերվում սովորական անդամությունից: «Դրանք ուղղակի տարբեր կարգավիճակներ են, բայց ասոցիացված անդամները ունեն նույն իրավունքներն ու արտոնությունները, ինչ սովորական անդամները»,- նկատեց դիվանագետը:
Նա նշեց, որ բանակցությունների ընթացքում հաշվի են առնվելու տարբեր ոլորտների առանձնահատկությունները՝ լինեն դրանք օրենսդրական, թե տնտեսական ու քաղաքական։ Դիվանագետի խոսքով, բանակցությունների ժամանակ հատուկ ուշադրություն է դարձվելու հարավկովկասյան երկրների ժողովրդավարացմանը, քանի որ այդ հարթության վրա բոլոր երեք հանրապետություններն էլ խնդիրներ ունեն: